Featured Post

അടയ്ക്ക ബിസിനസ് - 1

                                      ഒന്നാം ഭാഗം: തമ്പി ഉച്ചയോടു അടുത്ത സമയം. മര്യാദാമുക്കിൽ ഏതാനും പേർ സൊറ പറഞ്ഞിരിക്കുന്നുണ്ട്. അപ്പോൾ...

Tuesday, April 17, 2012

പ്രൈഡ് ഓഫ് മഡോണ - 2

പിറ്റേന്നു രണ്ടുപേരും മേലാപ്പിള്ളി ജ്വല്ലറിവർക്ക്‌സിലെ ജയേഷിനെ പോയികണ്ടു. അദ്ദേഹത്തിനു യമഹ YBX ഉണ്ട്. റേസിങ്ങിനു ഉപയോഗിക്കാവുന്ന തരം. മുടിഞ്ഞ പിക്കപ്പ്. ഏതാനും സെക്കന്റുകൾക്കുള്ളിൽ അറുപതുകിലോമീറ്റർ വേഗതയെടുക്കും. തൻമൂലം പിൻസീറ്റ്, ചാരിയിരിക്കാൻ കഴിയുന്നവിധം രൂപകല്പന ചെയ്തതാണ്. ബൈക്കിന്റെ ഹാൻഡിലും പ്രത്യേകം പണിയിച്ചതാണ്.

രണ്ടുപേരും എത്തുമ്പോൾ ജയേഷ് കാർപോർച്ചിൽനിന്നു ബൈക്കിറക്കി കഴുകുകയായിരുന്നു. അരികിൽ സർഫ് കലക്കിയ വെള്ളം. കയ്യിൽ തുണിക്കഷണം. ആഗതരെ കണ്ട് ജയേഷ് കുശലം ചോദിച്ചു.

“എങ്ങനെണ്ടായിരുന്നു ആശാനേ ന്യൂയർ?”

ആശാൻകുട്ടി സംഭവങ്ങൾ ഒന്നും ഓർമയില്ലെന്നു പറഞ്ഞു. ബൈക്കിനെ തലോടി തിരിച്ചുചോദിച്ചു.

“വണ്ട്യെങ്ങനെ. കൊഴപ്പൊന്നൂല്ല്യല്ലോ?”

“എന്തൂട്ട് കൊഴപ്പം. ഇവൻ കൊമ്പനല്ലേ”

സജീവൻ പറഞ്ഞു. “അപ്പോ ഇതുമതി. ഞാനൊറപ്പിച്ചു”

ജയേഷ് അമ്പരന്നു. “എന്തൂട്ടാ ആശാനേ അവനൊറപ്പിച്ചേ?”

“സ്കൂൾ ഗ്രൗണ്ടീ റേസിങ്ങ് നടത്താൻ പോണ കാര്യം നീയറിഞ്ഞില്ലേ?”

“ഉവ്വ്. അവൻമാർക്കു വേറെ പണീല്യ. കൊറച്ചുനാള് മുമ്പാണെങ്കീ ഞാനൊര് കൈ നോക്കായിരുന്ന്. ഇപ്പ എന്റെ കല്യാണം ഒറപ്പിച്ച സമയാ. അതോണ്ട് ഞാനില്ല”

ആശാൻ നമ്പറിട്ടു. “എന്നാലും

“വേണ്ടാശാനേ. എനിക്ക് ഇന്ററസ്റ്റില്ല. നീ നിർബന്ധിച്ചാലും കാര്യല്ല്യ”

“അങ്ങനാണെങ്കി നമക്ക് വേറാരേങ്കിലും എറക്കണം”

“എന്താ സംശയം. എറക്കണം”

“സജീവൻ എറങ്ങാൻ തയ്യാറാ. അതാ ഞാനവനേം കൂട്ടി ഇങ്ങട് വന്നേ”

ജയേഷ് അമ്പരന്നു. “അതിനെന്തിനാ ഇങ്ങട് വന്നേ? ഗ്രൗണ്ട് ബോയ്സാ പരിപാടി നടത്തണെ. ഞാനല്ല”

“അതറിയാം. പക്ഷെ റേസിങ്ങിനു നിന്റെ വണ്ട്യാണ് സജീവൻ ഓടിക്കണെ”

“ആരു പറഞ്ഞു?”

ആശാൻ ജയേഷിന്റെ അടുത്തു ചെന്നു. കൈത്തലം കയ്യിലെടുത്തു.

“ഇതൊക്കെ ആരെങ്കിലും പറേണോ ജയേഷേ. നിന്റെ ബൈക്ക്, എന്റെ ബൈക്ക്. എന്റെ ബൈക്ക്, സജീവന്റെ ബൈക്ക്. സജീവന്റെ ബൈക്കോ നിന്റെ ബൈക്ക്! അങ്ങനല്ലേ?”

 “അങ്ങനല്ല!!” ജയേഷ് ഇടഞ്ഞു. “എന്റെ ബൈക്ക്, എന്റെ ബൈക്ക്. നിന്റെ ബൈക്കും എന്റെ ബൈക്ക്. സജീവന്റെ ബൈക്കും എന്റെ ബൈക്കന്നെ”

കയ്യിലെടുത്തു പിടിച്ചിരുന്ന ജയേഷിന്റെ കൈത്തലം ആശാൻകുട്ടി വിട്ടു. “ഉണ്ട. നീയിമ്മാതിരി സ്വാർത്ഥനാവരുത്”

ജയേഷ് സ്വരം മയപ്പെടുത്തി. “ആശാനേ ഞാൻ വാക്കുമാറ്റാന്ന് നീ കര്തരുത്. എന്താന്ന്വച്ചാ ബൈക്ക് ഓക്ക്യാന്ന് പറഞ്ഞെങ്കിലും സത്യത്തീ വണ്ടി കമ്പ്ലൈന്റാ. ഞാൻ എട്‌ത്തട്ടിപ്പോ ഒര് മൂന്ന് മാസായിണ്ടാവും”

“എന്നട്ട് ഇന്നലെ നിന്റെ അനിയനെ അന്നമനടേല് ഈ കമ്പ്ലൈന്റ് വണ്ടീമെ കണ്ടതോ?”

“അതാ അത് കമ്പ്ലൈന്റിന്റെ അവനറിയില്ലാര്ന്ന്”

“എന്നാ കമ്പ്ലൈന്റിന്റെ കാര്യം എനിക്കും അറീല്ലാന്ന് കര്തിയാ മതി” സജീവൻ പറഞ്ഞു.

രക്ഷയില്ലെന്നു കണ്ട് ജയേഷ് കീഴടങ്ങി. റേസിങ്ങ് മൽസരത്തിനു ബൈക്ക് കൊടുക്കാമെന്നു സമ്മതിച്ചു.

സജീവൻ റേസിങ്ങിൽ കാതിക്കുടത്തെ പ്രതിനിധീകരിക്കുന്ന വാർത്ത പിറ്റേന്നു ഉച്ചയോടെ സ്ഥിരീകരിച്ചു. സജീവന്റെ പടമുള്ള ഫ്ലക്‌സ്ബോർഡുകൾ കാതിക്കുടം ജംങ്ഷനിലും, കട്ടപ്പുറം ബൈപ്പാസിലും, അന്നമനട പാലത്തിനു കുറുകെയും ദീപാലങ്കാരം സഹിതം വലിച്ചുകെട്ടി. ഫ്ലക്‌സ് ബോർഡിൽ ‘പ്രൈഡ് ഓഫ് മഡോണ’ക്കു ആയിരമായിരം അഭിവാദ്യങ്ങൾ അർപ്പിക്കുന്നവരുടെ പേരുകൾ. കൂടാതെ ട്രാക്ക്സ്യൂട്ട് ധരിച്ചു കയ്യിൽ ഹെൽമറ്റുമായി നിൽക്കുന്ന സജീവന്റെ പടം. കണ്ണുകെട്ടിയും, സീറ്റിൽ ചമ്രംപടിഞ്ഞിരുന്നും, ചക്രം നിലംതൊടാതെയും, തറയോടു കിടത്തിയും ബൈക്കോടിക്കുന്ന വിവിധപോസുകൾ വേറെയുമുണ്ട്. ഈ പടങ്ങൾകണ്ടു മൽസരത്തിനു പേരുകൊടുത്തിരുന്ന മൂന്നുപേർ ഭയന്നു പിൻമാറി. സജീവനുവേണ്ടി ഉയർത്തിയ ഫ്ലക്സ്ബോർഡുകളിൽ ‘കറുത്ത കുതിര’ എന്ന അടിക്കുറിപ്പോടെ പ്രഭാകരേട്ടനും ഇടംപിടിച്ചു. ലൂണ കിക്ക് ചെയ്യുന്ന പോസിൽ നാലഞ്ചു പടങ്ങളും ഉണ്ടായിരുന്നു.

റേസിങ്ങ് മൽസരത്തിനു മുന്നോടിയായി വാളൂർ, പുളിക്കകടവ്, കാതിക്കുടം, അന്നനാട്, കട്ടപ്പുറം, കുലയിടം എന്നീ സ്ഥലങ്ങളിലെ റോഡ് ടാർ ചെയ്യാൻ കാടുകുറ്റി പഞ്ചായത്ത് അടിയന്തിരമായി യോഗംചേർന്നു ഫണ്ട് അനുവദിച്ചു. റോഡിനു വീതികൂട്ടി ഡിവൈഡറുകൾ എടുത്തുമാറ്റി. വളവുകളും ജംങ്ഷനുകളും സൂചിപ്പിക്കാൻ സിഗ്നൽ ബോർഡ് വച്ചു. ഹമ്പുകളിൽ പെയിന്റ് അടിച്ചു. അങ്ങിനെ റേസിങ്ങ് മൽസരം മൂലം നാട്ടുകാർക്കും ഗുണങ്ങളുണ്ടായി.

അങ്ങിനെ കാത്തിരുന്ന ബൈക്ക് റേസിങ്ങ് ദിനം എത്തി. സജീവൻ രാവിലെ അമ്പലക്കുളത്തിൽ കുളിച്ച് ശാസ്താവിനെ സാഷ്ടാംഗം പ്രണമിച്ചു. റേസിങ്ങിൽ ജയിച്ചാൽ കൂട്ടുപായസം, നിറമാല, കർപ്പൂരം കൊണ്ടു തുലാഭാരം, ഭദ്രകാളിക്കു പട്ടും ഗുരുതിയും, ഉത്രംവിളക്ക് ഉൽസവത്തിനു മേജർ സെറ്റ് പഞ്ചവാദ്യം, അയ്യപ്പൻവിളക്കിനു അഞ്ചുപാട്ട വെളിച്ചെണ്ണ തുടങ്ങി അനേകം വാഗ്ദാനങ്ങൾ നേർന്നു. ശ്രീനിവാസസ്വാമി സജീവനെ പ്രത്യേകമായി ഉള്ളിലേക്കു വിളിപ്പിച്ച് മന്ത്രിച്ചൂതിയ ഒരു രക്ഷ കൈത്തണ്ടയിൽ കെട്ടിക്കൊടുത്തു.

ഉച്ചക്കു മൂന്നുമണിക്കു ബൈക്ക് റേസിങ്ങ് ആരംഭിച്ചു. പത്തുപേരാണ് മത്സരിക്കാനുണ്ടായിരുന്നത്. ചെറുവാളൂർ ഗ്രൌണ്ടിൽ, സ്‌കൂളിന്റെ സ്റ്റേജുതൊട്ടു പിഷാരത്ത് അമ്പലത്തിലെ ആൽ‌മരം വരെ ദീർഘവൃത്താകൃതിയിൽ ട്രാക്ക് വരച്ചിട്ടുണ്ട്. എല്ലാ ബൈക്കും രണ്ട് ലാപ് ഗ്രൌണ്ടിൽ ഓടിയിട്ടാണ് പുളിമരത്തിനടുത്തുള്ള എക്‌സിറ്റ് പോയിന്റിലൂടെ റോഡിലേക്കു ഇറങ്ങുന്നത്. ആദ്യത്തെ ലാപ്പ് പിന്നിട്ടപോൾ തന്നെ സജീവൻ ലീഡെഡുത്തിരുന്നു. പക്ഷേ രണ്ടാമത്തെ ലാപ്പിന്റെ പകുതിയായപ്പോൾ ബൈക്ക് പതുക്കെ ‘വലിയു’ന്നില്ലേയെന്നു സംശയം തോന്നി. എന്താണ് കാരണമെന്നു ആലോചിക്കേ YBX ഓട്ടം മതിയാക്കി നിന്നു. സജീവനെ കടന്നു മൂന്നു പേർ കുതിച്ചു. സമയം പാഴാക്കാതെ സജീവൻ ബൈക്ക് കിക്ക് ചെയ്യാൻ തുടങ്ങി. സ്റ്റാർട്ട് ആയതേയില്ല. വണ്ടി കുലുക്കിനോക്കി. പെട്രോൾ ആവശ്യത്തിനുണ്ട്. പിന്നെന്താണ് കാരണം? വേറെ അഞ്ചുപേർ കൂടി സജീവനെ കടന്നു പോയി. റേസിങ്ങ് മൽസരത്തിൽ ആകെ പത്തുപേരാണ് ഉള്ളത്. അവരിൽ എട്ടു പേരും പോയിക്കഴിഞ്ഞു. ഏറ്റവും ഒടുവിൽ പ്രഭാകരൻ ചേട്ടനുമെത്തി. അദ്ദേഹം ലൂണ നിർത്തി ചോദിച്ചു.

“എന്തൂട്ടാ സജീവാ പറ്റ്യേ?”

സജീവൻ മിണ്ടിയില്ല. പ്രഭാകരേട്ടൻ സഹായം വാഗ്ദാനം ചെയ്‌തു. “ലൂണ വേണോ?”

സജീവൻ ചൂടായി. “എന്തൂട്ടിനാ?”

“വേണന്ന്വച്ചാ അവന്മാരെ ഒന്ന് പിടിക്കാം”

“എനിക്ക് പിടിക്കണ്ട. പ്രഭാകരേട്ടൻ പോയി പിടി”

“എന്നാ ശരി. ഞാനൊരു കൈ നോക്കട്ടെ”

പ്രഭാകരേട്ടൻ മന്ദം മന്ദം, മറ്റു മൽസരാർത്ഥികളെ ‘പിടിക്കാൻ’ പോയി. സജീവനു മരിച്ചാൽ മതിയെന്നായി. മൽസരത്തിനു മുന്നോടിയായി എന്തൊക്കെയാണു കാണിച്ചുകൂട്ടിയത്. ഫ്ലക്സ് ബോർഡ് വയ്ക്കൽ, മൈക്കിൽ നാടുനീളെ വിളിച്ചുപറയൽ, ആരതി ഉഴിയൽ തുടങ്ങി ജയിച്ചാൽ നടത്തേണ്ട സ്വീകരണത്തിനുവരെ ഏർപ്പാടുകൾ ചെയ്തുകഴിഞ്ഞു. ഇപ്പോൾ അതെല്ലാം തകിടം മറിഞ്ഞിരിക്കുന്നു. എല്ലാ പ്രതീക്ഷകളും ചാരമായി. ഇനിയെങ്ങിനെ നാട്ടുകാരുടെ മുഖത്തു നോക്കും. മാനം പോയതോർത്തു ‘പ്രൈഡ് ഓഫ് മഡോണ’ തരിച്ചുനിന്നു. അന്നേരം YBX ബൈക്കിന്റെ ഉടമസ്ഥൻ ജയേഷ് കാണികൾക്കിടയിൽനിന്നു എഴുന്നേറ്റു. അദ്ദേഹം ഉച്ചത്തിൽ വിളിച്ചുപറഞ്ഞു.

“സജീവാ പെട്രോൾ ടാങ്ക് തൊറന്ന് അഞ്ചാറു പ്രാവശ്യം ഊത്യാ മതീടാ. ഒക്കെ ശര്യാവും”

സജീവൻ പല്ലുഞെരിച്ചു തിരിച്ചുചോദിച്ചു.

“അഞ്ചുപ്രാവശ്യം മത്യാ?”

ജയേഷ് മിണ്ടിയില്ല. സജീവൻ ഊതാൻ തയ്യാറെടുത്തു. കുനിഞ്ഞു നടക്കുന്ന ശീലമുള്ള സജീവൻ തലപ്പൊക്കം നോക്കാൻ ആനകൾ നിൽക്കുന്നപോലെ നീണ്ടുനിവർന്നു ശ്വാസം ഉള്ളിലേക്കു ആഞ്ഞുവലിച്ചു. വയർ വീർത്തു. കവിൾ വീർത്തു. രോമങ്ങൾ എഴുന്നു. രണ്ടുതുള്ളി മൂത്രം ലിംഗാഗ്രത്തിലും വന്നുനിന്നു. ഒടുക്കം ഉള്ളിലേക്കു വലിച്ച വായു മുഴുവൻ അദ്ദേഹം ടാങ്കിലേക്കു ചെലുത്തി. വീണ്ടും ശ്വാസം വലിക്കൽ. ഊതൽ. അങ്ങിനെ അഞ്ചുപ്രാവശ്യം. അതെങ്ങാനും മതിയായില്ലെങ്കിലോ എന്നോർത്ത് മൂന്നുപ്രാവശ്യം പിന്നേയും ഊതി. ആദ്യത്തെ കിക്കിൽതന്നെ വണ്ടി സ്റ്റാർട്ടായി. പിന്നെയാരും സജീവനെ കണ്ടില്ല. അതാണ് ‘പ്രൈഡ് ഓഫ് മഡോണ’! കാണികൾക്കിടയിൽനിന്നു കയ്യടിയും വിസിലടിയും ഉയർന്നു.

ഇയ്യാത്തുംകടവ്, പുളിയ്‌ക്കകടവ്, അന്നമനട റോഡുകളിലൂടെ ബൈക്കുകൾ പാഞ്ഞു. ജനങ്ങൾ ചീറിപ്പാഞ്ഞു. റേസിങ്ങ് അന്നമനട കടന്നു. വൈന്തല കടന്നു. കടന്ന പ്രദേശങ്ങൾ നിലംപരിശായി. ഞളർക്കടവ് പാലത്തിലേക്കു ബൈക്കുകൾ കയറുമ്പോൾ സജീവൻ ഏഴാമനായി തോൽവിയെ അഭിമുഖീകരിക്കുകയായിരുന്നു. അന്നേരം കക്കാടിൽനിന്നു കൊരട്ടി പോലീസ്‌ സ്റ്റേഷനിലേക്ക് ഒരു വിളിപോയി.

ടിർണീം ടിർണീം!!

ഉച്ചമയക്കത്തിലായിരുന്ന പ്രഗൽഭനായ സർക്കിൾ വേണുഗോപാലൻ ഉറക്കച്ചടവോടെ റിസീവർ കയ്യിലെടുത്തു. ഒരു കൂർക്കംവലിയുടെ ടോണിൽ പറഞ്ഞു.

“യെസ് സർക്കിൾ വേണു ഹിയർ”

അപ്പുറത്തുനിന്നു കൂസലില്ലാത്ത ചോദ്യം. “സാറിന്റെ ഉറക്കം കഴിഞ്ഞാ?”

സർക്കിൾ കോപാകുലനായി. ഉറക്കക്ഷീണം പമ്പകടന്നു. “ശ്‌ചീ റാസ്‌കൽ. @#$%”

“ഉച്ചയ്ക്കൊറങ്ങ്യാ പിത്തക്കാട്യാവും സാറേ?”

“നിർത്തടാ നിന്റെ അധികപ്രസംഗം. $#@%^$

“സാറേ നാലഞ്ച് പിള്ളേര് വെള്ളമടിച്ചു ബൈക്കീക്കേറി നാടു കൊളമാക്കാണ്. മൊത്തം ആക്സിഡന്റ്. സാറപ്പോ ഉച്ചറ്റൊറക്കത്തിലും. സാറെവടത്തെ പോലീസാ”

ഫോണിലൂടെ വന്നത് പരിചിതശബ്ദമല്ലേയെന്നു സർക്കിളിനു സംശയം. “നിന്റെ സൗണ്ട് എവടാണ്ട് കേട്ടണ്ടല്ലാ”

“ഹ ഇല്ല സാറേ. ഞാനാദ്യായാ ഒരാളെ ഫോണീ വിളിക്കണതന്നെ”

“ഛീ സത്യം പറടാ. ആരാ നീ?”

അപ്പുറത്തുനിന്നു മറുപടി കിട്ടിയില്ല. പകരം കൂട്ടക്കരച്ചിൽ ഉയർന്നു. തികച്ചും ദാരുണവിലാപം. സർക്കിൾ ഞെട്ടി. കാര്യം തികഞ്ഞ ഗൗരവമാണ്. അപ്പുറത്തു മരണമോ മറ്റോ സംഭവിച്ചിട്ടുണ്ടെന്നു തോന്നുന്നു. കൊരട്ടിസ്റ്റേഷൻ പരിധിയിൽ ആരു കരഞ്ഞാലും പാഞ്ഞെത്തുന്ന സർക്കിൾ സംശയങ്ങൾ മാറ്റിവച്ചു ചോദിച്ചു.

“ടെൽ മി. അവരിപ്പോൾ എവടെ?”

“കട്ടപ്പൊറത്ത് എത്താറായിണ്ട് സാറേ”

സർക്കിൾ ആക്രോശിച്ചു. “എന്നാ കട്ടപ്പൊറത്ത് അവരെ ചിത കൂട്ടിക്കോ. ഞാൻ വരുന്നു”

തന്റെ അധികാരപരിധിയിൽ ഒരുകൂട്ടം യുവാക്കൾ മദ്യപിച്ച്, ജനങ്ങളെ ബുദ്ധിമുട്ടിച്ചുകൊണ്ടു അഴിഞ്ഞാടുന്നോ! അനുവദിക്കാനാകില്ല ഇത്. തെറ്റുകാരാണെങ്കിൽ അവരുടെ കാശുകുടുക്കയിൽ മുളകരച്ചു തേക്കണം. സർക്കിൾ ഉറപ്പിച്ചു. സഹപ്രവർത്തകരെയും കൂട്ടി രണ്ടു ജീപ്പുകളിലായി വേട്ടക്കിറങ്ങി. കൊരട്ടി ജംങ്ഷനിൽ ജീപ്പ് നിർത്തി രണ്ടുപായ്ക്കറ്റ് മുളകുപൊടിയും നൂറ് ഗ്രാം പച്ചമുളകും വാങ്ങി.

കട്ടപ്പുറത്തുനിന്നു കുലയിടത്തേക്കു തിരിയുന്ന, മൂന്നുവഴികൾ കൂടിയ ജംങ്ഷനിൽ പോലീസ് ജീപ്പ് വിലങ്ങനെ നിർത്തിയിട്ടു. ഇതല്ലാതെ പിള്ളേർക്കു ഒളിച്ചുകടക്കാൻ വേറെ മാർഗമില്ല. റോഡിൽ പാർക്ക് ചെയ്തിട്ടുള്ള വാഹങ്ങൾ നീക്കം ചെയ്യാനും, ജനങ്ങളെ ഒഴിപ്പിക്കാനും സർക്കിൾ ഒരു പോലീസുകാരനെ പട്രോളിംങ് ബൈക്കിൽ കാതിക്കുടത്തേക്കു അയച്ചു. ശേഷം ജീപ്പിൽ നിന്നിറങ്ങി പരിസരവീക്ഷണം നടത്തി. സർക്കിൾ മ്ലാനവദനായി. ചുറ്റുമുള്ള വീടുകൾ അടഞ്ഞുകിടക്കുന്നു. എല്ലാവരും ഉച്ചമയക്കത്തിൽ. പ്രമാദമായേക്കാവുന്ന ഈ ഓപ്പറേഷൻ കാണാൻ ഒറ്റ മനുഷ്യനില്ലെന്നോ? സർക്കിളിനു സഹിച്ചില്ല. ലൗഡ് സ്പീക്കറും മെഗാഫോണും എടുത്തു അനൗൺസ് ചെയ്തു. ‘തെമ്മാടികളായ ഒരുപറ്റം യുവാക്കാൾ മദ്യപിച്ച് ബൈക്കിലൂടെ സഞ്ചരിച്ച് നാട്ടിൽ അരാജകത്വം സൃഷ്ടിക്കുന്നുണ്ടെന്നും ഇവരെയെല്ലാം കൊരട്ടി സ്റ്റേഷനിലെ ലോക്കപ്പിലിട്ട് ചതയ്ക്കാതെ പച്ചവെള്ളം തൊടില്ലെന്നും, ജനങ്ങൾ ഒരുകാരണവശാലും ഭയക്കേണ്ടതില്ലെന്നും’ സർക്കിൾ അത്യുച്ചത്തിൽ മെഗാഫോണിലൂടെ നാലഞ്ച് തവണ ചീറി. ഉച്ചമയക്കത്തിലായിരുന്ന ജനങ്ങൾ ഞെട്ടിയെഴുന്നേറ്റു. അവർ ടെറസിലും പൂമുഖത്തും കുഞ്ഞുകുട്ടി പരാധീനങ്ങൾ സഹിതം ഹാജരായി അരങ്ങേറാൻ പോകുന്ന സംഭവങ്ങൾക്കു സാക്ഷിയാകാൻ കാത്തുനിന്നു. ചുരുക്കിപ്പറഞ്ഞാൽ സർക്കിളിന്റെ ബുദ്ധി ഏറ്റു. ചുറ്റുമുള്ള വീടുകളിലേക്കു പാളിനോക്കി, എന്നാൽ നോക്കുന്നേയില്ല എന്ന ഭാവത്തിൽ, സർക്കിൾ കൊമ്പൻമീശ പിരിച്ചു. ലാത്തികൊണ്ടു കൈവെള്ളയിൽ നിരന്തരം അടിച്ചു അക്ഷമ പ്രകടിപ്പിച്ചു. ഒരു പോലീസുകാരനെ വിളിച്ച് പച്ചമുളക് നീളത്തിൽ കീറാൻ പറഞ്ഞു.

ബോണറ്റിൽ കൈചാരി ‘തെമ്മാടികളെ’ കാത്തുനിന്ന സർക്കിൾ ഒരു ബൈക്കിന്റെ ഇരമ്പൽ കേട്ടു. സംഘാംഗങ്ങൾക്കു ഉടൻ അലർട്ട് കൊടുത്തു. എല്ലാവരും ജാകരൂകനായി. പക്ഷേ ഓവർസ്പീഡിൽ വന്നത് പട്രോളിങ്ങിനു അയച്ച പോലീസുകാരനായിരുന്നു. പ്രതീക്ഷിച്ചതിനു വിപരീതമായി അദ്ദേഹം ബൈക്ക് നിർത്താതെ പോലീസ് സംഘത്തെ വെട്ടിച്ചു കടന്നുപോയി. ജനങ്ങൾക്കു മുന്നിൽ സർക്കിൾ ഇളിഭ്യനായി. കോൺസ്റ്റബിളിനു എന്തു ശിക്ഷ കൊടുക്കണമെന്നു ചിന്തിച്ചുനിൽക്കുന്ന സർക്കിളിനു നേരെ, കവലക്കു മുന്നിലെ ഇറക്കമിറങ്ങി, ഏതാനും ബൈക്കുകൾ മിസൈൽ കണക്കെ പാഞ്ഞുവന്നു. കോൺസ്റ്റബിൾ നിർത്താതെ പോയതിന്റെ കാരണം അങ്ങിനെ വ്യക്തമായി. ഒരു നിലവിളിയോടെ സർക്കിൾ ജീപ്പിന്റെ ബോണറ്റിൽ ചാടിക്കയറി. ബാക്കിയുള്ള പോലീസുകാർ ജീപ്പിനു പിന്നിൽ ഒളിച്ചു. പിന്നേയും ‘മിസൈലുകൾ’ പാഞ്ഞുവന്നു. പോകാൻ ഇടമില്ലാത്തതിനാൽ അവ കവലയിൽ നിർത്തി. സർക്കിൾ അതിനകം ആദ്യത്തെ ഞെട്ടലിൽനിന്നു മുക്തനായിരുന്നു. എല്ലാ റേസിങ് മൽസരാർത്ഥിയേയും പോലീസുകാർ വളഞ്ഞു.

ജീപ്പിന്റെ ബോണറ്റിൽ നീളത്തിൽ കീറിയ പച്ചമുളക് കണ്ടതോടെ സർക്കിളിനെ അറിയാവുന്നവർ മൽസരം മതിയാക്കി കണ്ടവഴിയിലൂടെ പാഞ്ഞു. എന്നിട്ടും മൂന്നുപേർ പിടിയിലായി. മൂന്നുപേരുടേയും പാന്റിനകം നീറിപ്പുകഞ്ഞു. അവർ വെള്ളം തേടിയോടി. തിരക്കെല്ലാം ഒതുങ്ങിയ നേരത്ത് അതാ വരുന്നു വേറെ രണ്ടുപേർ. സർക്കിൾ ഇരുവരേയും തടഞ്ഞു. പച്ചമുളക് തീർന്നതിനാൽ മുളകുപൊടി പായ്ക്കറ്റ് പൊട്ടിച്ചു. രണ്ടുപേരുടേയും ഉള്ളം കിടുങ്ങി.

ഒരാൾ ഉടൻ പറഞ്ഞു. “വേണുച്ചേട്ടാ. ഇത് ഞാനാ സജീവൻ”

“ഏത് സജീവൻ?”

“പ്രൈഡ് ഓഫ് മഡോണ!”

കാതിക്കുടത്തിന്റേയും പ്രൈഡ്. ആൾ കുഴപ്പക്കാരനല്ല. പരോപകാരിയുമാണെന്നു കേട്ടിട്ടുണ്ട്. സർക്കിൾ ചോദിച്ചു.

“എവടക്കാടാ ഈ പാച്ചില്?”

സജീവൻ ആലോചിച്ചു. പരിചയക്കാരനാണെങ്കിലും ചില്ലറ കാര്യം പറഞ്ഞാലൊന്നും സർക്കിൾ വിടില്ല. അത്രക്കു കാർക്കശ്യമാണ് കൃത്യനിർവഹണത്തിൽ. ഒരു മെഡിക്കൽ കാരണം തന്നെ പറഞ്ഞേക്കാം.

“ഞാൻ അർജന്റായിട്ട് ഗുളിക വാങ്ങാൻ പോണതാ വേണുച്ചേട്ടാ”

സർക്കിൾ തിരക്കി. “ആർക്കാടാ ഗുളിക?”

യാതൊരു സംശയത്തിനും ഇടനൽകാത്ത പേരു വേണമെന്നതിനാൽ സജീവൻ കാച്ചി.

“നമ്മടെ ഫൽഗൂന്”

ഫൽഗുണനെ സർക്കിളിനു പണ്ടുമുതലേ അറിയാം. അതിനാൽ തടസം പറഞ്ഞില്ല. “എന്നാപ്പിന്നെ സമയം കളയണ്ട. വേം വിട്ടോ”

അങ്ങിനെ സജീവൻ രക്ഷപ്പെട്ടു. ഏഴാമതായിരുന്നവൻ ഇപ്പോൾ ഒന്നാമത്. എല്ലാം വേണു കടാക്ഷം. സജീവൻ ഊരിപ്പോയതു കണ്ട് മറ്റവനും വേലയിറക്കി.

“ഞാനും ഗുളിക വാങ്ങാൻ പോണതാ സാറേ?”

സർക്കിൾ ഞെട്ടി. തന്നെ ഇത്രമാത്രം നിസാരനായി പരിഗണിക്കുന്നോ?

“നിന്റെ പേരെന്താ?”

“ബെന്നി. കൂട്ടാര് ‘പരുന്ത്’ എന്നു വിളിക്കും”

“പരുന്തോ!”

“ഞാൻ വണ്ടിയോടിക്കുന്നത് പരുന്ത് പറക്കണ പോല്യാന്നാണ് എല്ലാവരും പറയാറ്”

“ഹഹഹഹ കൊള്ളാം. കൊള്ളാം” സർക്കിൾ ചിരിച്ചു. യുവാവ് വീണ്ടും ഉണർത്തിച്ചു. “സാറേ ഗുളിക വേഗം വാങ്ങണം”

“ആർക്കാടാ നീ ഗുളിക വാങ്ങാൻ പോണെ?”

സജീവൻ പറഞ്ഞ പേരു ആരുടേതാണെന്നു ബെന്നി കേട്ടില്ലായിരുന്നു. എങ്കിലും നാട്ടിലെ കീഴ്വഴക്കമനുസരിച്ച് അദ്ദേഹവും കാച്ചി.

“നമ്മടെ ഫൽഗൂന്”

“നിനക്കൊള്ള ഗുളിക ഞാൻ തരാം” പയ്യൻ കളിപ്പിക്കുകയാണ്. തികഞ്ഞ അവഹേളനം.
സർക്കിൾ കോൺസ്റ്റബിളിനെ വിളിച്ചു. “മോഹനാ നാല് ഗുളികയെട്‌ക്ക്”

കോൺസ്റ്റബിൾ മുളകുപൊടി പാക്കറ്റുമായെത്തി. മൂന്നു പോലീസുകാർ ‘പരുന്തി’ന്റെ കയ്യും കാലും ചിറകും കൂട്ടിപ്പിടിച്ചു. സർക്കിൾ പൊക്കിളിനും പാന്റിനുമിടയിൽ ലാത്തി കുത്തിത്തിരുകി ഇടമുണ്ടാക്കി മുളകുപൊടി മിതമായതോതിൽ തൂകി. പത്തുപ്രാവശ്യം സിറ്റപ്പ് എടുപ്പിച്ചു. പരുന്ത് അവശനായതോടെ സർക്കിൾ വെറുതെവിട്ടു.

“അവനെ വിട്ടേര് മോഹനാ. ഇപ്പോ പോയാ ഒന്നൂടി മയങ്ങാൻ സമയണ്ട്”

സർക്കിളും സംഘവും സ്റ്റേഷനിലേക്കു യാത്രയായി. പക്ഷേ പരുന്തിന്റെ അവശത അഭിനയമായിരുന്നെന്നും അദ്ദേഹത്തിനു മുളകുപൊടി ഏശിയില്ലെന്നും സർക്കിളിനു മനസ്സിലാക്കാനായില്ല.

ഇതിനിടയിൽ സജീവൻ കുതിപ്പ് തുടരുകയായിരുന്നു. തോറ്റെന്നു കരുതിയ മൽസരം തിരിച്ചുപിടിച്ച ആവേശം. സർക്കിളിനെ വിളിച്ചുപറഞ്ഞത് ആരാണെന്നു ഊഹിക്കാവുന്നതേയുള്ളൂ. ആ അഭിവന്ദ്യരെ മനസ്സാൽ നമിച്ചു. ഇനി ഒരുത്തനും സർക്കിളിനെ കടന്നുപോരില്ല. അതു നിശ്ചയമാണെങ്കിലും സജീവൻ കുതിപ്പിൽ അയവുവരുത്തിയില്ല. കുലയിടവും പാറയവും ആദ്യത്തെ പത്തുസെക്കന്റിലും ചെറുവാളൂർ പൊസ്റ്റോഫീസ് പടി പതിനെട്ടാം സെക്കന്റിലും മൽസരം നടക്കുന്ന സ്കൂൾഗ്രൗണ്ട് ഇരുപത്താറാം സെക്കന്റിലും ‘പ്രൈഡ് ഓഫ് മഡോണ’ കവർ ചെയ്തു. ഗ്രൗണ്ടിൽ കാതടിപ്പിക്കുന്ന കരഘോഷം മുഴങ്ങി. സജീവൻ ഫാൻസ് ടാർറോഡിൽ നാലടി നീളമുള്ള മാലപ്പടക്കത്തിനു തിരി കൊളുത്തി.

അവസാനലാപ്പിലേക്കു കയറിയതോടെ സജീവൻ ബൈക്കിൽ എഴുന്നേറ്റു നിന്നു. വിജയിയാകാൻ പോകുകയല്ലേ? ആഹ്ലാദത്തിന്റെ പരമകോടിയിൽ അദ്ദേഹം കാണികളെ കൈവീശി അഭിവാദ്യം ചെയ്തു. ഗ്രൗണ്ടിനു സമീപമുള്ള പറമ്പുകളിൽ തടിച്ചുകൂടിയിരുന്ന സ്ത്രീജനങ്ങൾക്ക് ‘പറക്കുന്ന ഉമ്മകൾ’ തുരുതുരാ എറിഞ്ഞുകൊടുത്തു. സീറ്റിലിരുന്നു ചില അഭ്യാസങ്ങൾ കാണിച്ചു. അങ്ങിനെ ഫിനിഷിങ്ങ് ലൈനിലേക്കു വേഗത്തിൽ അടുത്തടുത്തു വന്നു. വിജയിയാകാൻ ഏതാനും വാരകൾ മാത്രം ബാക്കി. അപ്പോൾ YBX സാവധാനം പിന്നിലേക്കു വലിയാൻ തുടങ്ങി. ആക്സിലേറ്റർ കൂട്ടിയിട്ടും വണ്ടി വേഗതയെടുത്തില്ല. റേസിങ്ങ് മൽസരം ആരംഭിച്ച സമയത്തു സംഭവിച്ചപോലെ എൻജിൻ ഓഫായി. ബൈക്ക് നിന്നുപോയതിന്റെ കാരണം സജീവൻ മറന്നുപോയിരിക്കുമോ എന്ന സന്ദേഹത്തിൽ ജയേഷ് കാണികൾക്കിടയിൽ എഴുന്നേറ്റുനിന്നു പറഞ്ഞു.

“സജീവാ പെട്രോൾ ടാങ്ക് തൊറന്ന് അഞ്ചാറ് പ്രാവശ്യം ഊത്യാ മതീടാ. ഒക്കെ നേര്യാവും!”

സജീവൻ വണ്ടിയിൽ നിന്നിറങ്ങി. ഏതാനും തവണ കിക്ക് ചെയ്തിട്ടും ശരിയാകാത്തതിനാൽ ഊതാൻ തയ്യാറെടുത്തു. പക്ഷേ ശ്വാസം ഉള്ളിലേക്കു ആഞ്ഞുവലിക്കുമ്പോൾ ഒരു ബൈക്കിന്റെ ശബ്ദം അടുത്തുവരുന്നതായി തോന്നി. നിമിഷങ്ങൾക്കുള്ളിൽ സർക്കിൾ വേണു വെറുതെവിട്ട ‘പരുന്ത്’ രംഗപ്രവേശനം ചെയ്തു. കാണികൾ ഞെട്ടി. സജീവൻ അതിലേറെ ഞെട്ടി. സർക്കിൾ ചതിച്ചു. അതോ ഇവൻ വിദഗ്ദമായി ചാടിപ്പോന്നതോ? എന്തുതന്നെയായാലും ആലോചിക്കാൻ സമയമില്ല. ബെന്നി അവസാനലാപ്പിലേക്കു പ്രവേശിക്കുകയാണ്. സജീവൻ പെട്രോൾടാങ്ക് തുറന്നു ഊതിയില്ല. പകരം ബൈക്ക് ഫിനിഷിങ്ങ് ലൈനിലേക്കു ഉന്തി. അക്രമ‌ ഉന്ത്. ഉന്തുന്നതിനിടയിൽ ബൈക്ക് ഓൺ ആണെന്നു കാണികളെ തെറ്റിദ്ധരിപ്പിക്കാൻ അദ്ദേഹം നിരന്തരം ‘ഡൂ‌ർ‌ർർ. ഡുർർർ” എന്ന ശബ്ദം മിമിക്രിക്കാരെ വെല്ലുന്ന ഒറിജിനാലിറ്റിയിൽ പുറപ്പെടുവിച്ചു. ഫിനിഷിങ്ങ് ലൈൻ സ്പർശിക്കാറായപ്പോൾ ബൈക്കിൽ ചാടിക്കയറി. ഫലം, വിചാരിച്ചിരുന്നതിലും കുറച്ചുവൈകി റേസിങ്ങിൽ വിജയിയായി. എന്നിട്ടുപോലും അതൊരു റെക്കോർഡായിയെന്നത് ‘പ്രൈഡ് ഓഫ് മഡോണ’യുടെ പ്രാഗൽഭ്യത്തിനു അടിവരയിട്ടു.

റേസിങ്ങിന്റെ പിറ്റേന്നു ജയേഷിനെ അന്വേഷിച്ചു ആശാൻകുട്ടി വീട്ടിലെത്തി. വീട്ടുപടിക്കൽ നിർത്തിയ ഓട്ടോറിക്ഷയിൽ സജീവൻ ഉൾപ്പെടെ നാലുപേർ വേറെയുമുണ്ടായിരുന്നു. പക്ഷേ സംഘത്തിനു ജയേഷിനെ കണ്ടെത്താനായില്ല. പിറ്റേന്നും അതിന്റെ പിറ്റേന്നും പറ്റിയില്ല. ജയേഷ് വന്നത് ഒരുമാസം കഴിഞ്ഞാണ്. കക്കാട് തേമാലിപ്പറമ്പിനടുത്തുള്ള വീട്ടിൽ ഉമ്മറത്ത്, നെഞ്ചിലെ രോമക്കാടുകളിൽ വിരലോടിച്ചു വിശ്രമിക്കുന്ന ആശാനു മുന്നിൽ അദ്ദേഹം ഹാജരായി. അപ്രതീക്ഷിതമായ ആഗമനത്തിൽ ആശാൻ ചൂടായി.

“നിന്റെയൊക്കെ കിണ്ടിക്ക് പ്രശ്നം വന്നാ മാത്രേ നീ അനങ്ങൊള്ളൂ. അല്ലടാ?”

ആശാൻകുട്ടി നിർത്താതെ ശകാരം തുടർന്നു. അതിനിടയിൽ ജയേഷ് ഒരു കുപ്പിയെടുത്തു മുന്നിൽവച്ചു. ശകാരം പൊടുന്നനെ നിന്നു. മുഖം പ്രകാശിച്ചു. ആശാൻ കുപ്പിയുടെ സ്ഥാനം തനിക്കു മുന്നിലേക്കു മാറ്റുകയും ചെയ്തു.

“ഒക്കെ പോട്ടെ ജയേഷെ. ഞാനൊന്നും പറഞ്ഞൂല്യാ നീയൊന്നും കേട്ടൂല്യാ. സജീവനും ഒരെണ്ണം എത്തിച്ചേക്ക്”


സജീവൻ ഇന്നു മഡോണയിൽ ഇല്ല. പതിനഞ്ചുവർഷത്തോളം നീണ്ടുനിന്ന ബന്ധത്തിനു അവധി കൊടുത്തു അദ്ദേഹമിപ്പോൾ സ്വന്തം സ്ഥാപനം നടത്തുന്നു. വാഹനകച്ചവടത്തിന്റെ ഇടനിലക്കാരൻ സ്ഥാനം വഹിക്കുന്നു. അമ്പലത്തിലെ ഉൽസവങ്ങൾ ആയിരത്തിന്റെ നോട്ടുകൾ കീറിക്കൊടുക്കുന്നു. ഉൽസവത്തിനു ഭക്ഷണം വച്ച ചെമ്പുകൾ കമിഴ്ന്നു കിടന്ന് കഴുകുന്നു. എന്നിട്ടും ‘പ്രൈഡ്’ എന്നതിനൊപ്പം ‘മഡോണയും ബജാജും’ ഇന്നും കൂട്ടിനുണ്ട്.
നാട്ടിലെല്ലാവരും ‘ഗുളികയ്ക്കു പോകുന്ന’ മാധവൻ സുനി ‘അവനങ്ങനെ എഴുത്യാ. ഞാനവനൊന്ന് കാണട്ടെ’ എന്നു മൂക്കുകൊണ്ടു പറയുന്നത് ഞാൻ മനക്കണ്ണാൽ കാണുന്നു.

Sunday, April 1, 2012

പ്രൈഡ് ഓഫ് മഡോണ - 1


രണ്ടായിരമാണ്ടിലെ ആദ്യദിനം. തലേന്നു രാത്രിയിലെ ഹാങ്ങൊവർ വിട്ടുപോകാതെ, കൃസ്‌മസ് പപ്പായുടെ മുഖംമൂടി ധരിച്ചു സൈക്കിൾ ചവിട്ടിവരുന്ന അഖിലിനെ കണ്ടപ്പോൾ മര്യാദാമുക്കിലെ മതിലിൽ ഇരിക്കുന്ന ആശാൻകുട്ടി ശിവപ്രസാദ് കൈകൊട്ടി വിളിച്ചു.

“ഇവടെ വാടാ അഖീ”

കോനുപറമ്പൻ പോളിയുടെ മകൻ അഖിലിനു പതിനൊന്നു വയസ്സുണ്ട്. എന്തിനും ഏതിനും നല്ല ചുറുചുറുക്കു പ്രദർശിപ്പിക്കുന്നവൻ. അമിതോൽസാഹി. എല്ലാ പുതുവർഷത്തിനും സമീപത്തുള്ള പീക്കിരിപിള്ളേരെ ഒന്നിച്ചുകൂട്ടി, അവരിൽ ഒത്തൊരുമ ബോധം കുത്തിവച്ച്, ന്യൂഇയർ സംഘമായി പോകാറുള്ളവൻ. എല്ലാവീട്ടിലും കയറി ഡാൻസു കളിച്ച് കാശുവാങ്ങും. ഇന്നലേയും ന്യൂഇയറിനു പോയത് ആശാൻകുട്ടി കണ്ടിരുന്നു.

അഖിൽ മതിലിനു അരികിലെത്തി. ആശാൻ ചോദിച്ചു.

“ന്യൂഇയറിനു പോയിട്ടു എത്ര കാശുകിട്ടീടാ?”

“നൂറു രൂപ”

“ഛായ്, ആർക്കുവേണടാ ഈ നക്കാപ്പിച്ച. ഒരുരാത്രി മുഴ്വോൻ നെരങ്ങീട്ട് നൂറ് രൂപ്യേ” ആശാൻ കാർക്കിച്ചുതുപ്പി.

“ആട്ടെ നിനക്കെത്ര കിട്ടി?”

അഖിൽ അസ്വസ്ഥത ഭാവിച്ചു. “അതല്ലേ പറഞ്ഞേ. നൂറു രൂപാന്ന്”

“നിനക്കൊറ്റക്കു നൂറോ!. അപ്പോ എത്രാള്ണ്ടായിരുന്നു ഗ്യാങ്ങില്”

“എട്ട്”

ആശാന്റെ കണ്ണുതള്ളി. “അയ്യോ, എണ്ണൂറ്!”

“ആ ഏതാണ്ട് അത്രേം”

 “എന്നേങ്കൂടി വിളിക്കാര്ന്നില്ലേടാ അഖീ” ആശാൻ പരിതപിച്ചു.

“വിളിക്കാന്ന് വിചാരിച്ചതാ. പക്ഷേ വിദ്യാസാഗറു പറഞ്ഞു വേണ്ടാന്ന്”

‘അതെന്തേ?”

“പ്രസാദേട്ടൻ കാശുമക്കി ബിയറു കുടിക്കൂന്ന് അവൻ പറഞ്ഞു”

ആശാനു ദേഷ്യം വന്നെങ്കിലും മനസ്സിൽ പറഞ്ഞു. ദീർഘജ്ഞാനിയാണ്. നല്ലതു വരട്ടെ.

അഖിൽ അറിയിച്ചു. “വാളൂർ സ്കൂൾഗ്രൌണ്ടീ ബൈക്ക് റേസിങ്ങ് നടത്താൻ പോണ കാര്യം പ്രസാദേട്ടൻ അറിഞ്ഞാ”

മര്യാദാമുക്കിൽ അപ്പോൾ കൂടിയിരുന്ന എല്ലാവർക്കും അതു പുതിയ അറിവായിരുന്നു. ആശാൻ മുന്നോട്ടാഞ്ഞു. “റേസിങ്ങോ!”

“അതേന്ന്. ഗ്രൌണ്ട് ബോയ്‌സാ നടത്തണെ”

വാളൂർ സ്കൂൾ ഗ്രൗണ്ടിൽ ഫുട്‌ബാളും ക്രിക്കറ്റും കളിക്കുന്നവരാണ് ‘ഗ്രൗണ്ട് ബോയ്സ്’ എന്നും, ചിലപ്പോൾ ‘ഗ്രൗണ്ട് ബ്രദേഴ്‌സ്’ എന്നും അറിയപ്പെടുന്നത്. എല്ലാവരും വാളൂരിലും സമീപപ്രദേശങ്ങളിലും ഉള്ളവരാണ്. ക്രീഢാവിനോദങ്ങൾക്കു പുറമെ ഗ്രൗണ്ടിലെ മോറൽ പോലീസിങ്ങും ഇവരുടെ ചുമതലയാണ്. രാത്രിയിൽ ഗ്രൗണ്ടിലിരുന്നു ‘മിനുങ്ങാൻ’ വരുന്നവരെ അടിച്ചോടിക്കുക, വിശാലമായ മൈതാനത്തു ടുവീലർ ഓടിക്കുന്നതു പഠിക്കാൻ വരുന്നവരെ നിരുൽസാഹപ്പെടുത്തി തിരിച്ചയക്കുക എന്നിവയൊക്കെ ഇവരുടെ പരിധിയിൽ കാര്യങ്ങളാണ്. മൈതാനത്തിന്റെ ഉടമസ്ഥനായ ചങ്ക്രമത്ത് ശശിയുടെ എല്ലാ ആശീവാദവും ഗ്രൗണ്ട് ബോയ്‌സിനുണ്ട്.

ആശാൻ ചോദിച്ചു. “റേസിങ്ങ് നടത്താൻ മാത്രൊള്ള സൌകര്യൊന്നും ഗ്രൗണ്ടിലില്ലല്ലാ”

“ഗ്രൌണ്ട് മാത്രല്ലാ, അന്നമനട കാടുകുറ്റി വൈന്തല ഒക്കെ കവർ ചെയ്യും”

സംഭാഷണം ഇത്രയുമെത്തിയപ്പോൾ കക്കാടിലെ റാഷ് ഡ്രൈവർ പ്രഭാകരേട്ടൻ ലൂണയിൽ മന്ദം മന്ദം വന്നു. ലൂണ എവിടെ പോകുന്നോ അവിടെയൊക്കെ ഹിറ്റാണ്.

ആശാൻ വിളിച്ചു പറഞ്ഞു. “പ്രഭാകരേട്ടാ. വാളൂർ സ്കൂൾഗ്രൌണ്ടീ ബൈക്ക് റേസിങ്ങ് നടത്താൻ പോണൂന്ന്”

ആഗതൻ ചിന്തയിലാണ്ടു. “ലൂണക്കും പങ്കെടുക്കാമ്പറ്റോ പ്രസാദേ?”

“പിന്നല്ലാണ്ട്. പ്രഭാകരേട്ടൻ ഈ ചാൻസ് വിട്ട് കളയര്ത്. നമക്ക് കലക്കണം”

“നീയൊക്കെ കൂടെനിന്നാ.. ഞാനും എറങ്ങാം”

“എന്നാ പ്രഭാകരേട്ടൻ വിട്ടോ. ഞങ്ങ അറിയിക്കാം”

ആശാൻ മര്യാദാമുക്കിലുള്ള എല്ലാവരോടുമായി പറഞ്ഞു. “ഞാൻ പങ്കെടുത്താലോന്ന് ആലോചിക്കാണ്”

നവിച്ചൻ ചോദിച്ചു. “അതെങ്ങനാ ആശാനേ. വണ്ടി ഓടിക്കണങ്കീ നിനക്ക് രണ്ടെണ്ണം അടിക്കണ്ടേ?”

ആശാൻ നയം വ്യക്തമാക്കി. ”രണ്ടെണ്ണം അടിച്ചിട്ടേ ഞാനെന്തും ചെയ്യൂ”

“മൽസരക്കമ്മറ്റി സമ്മതിക്കില്ല”

ആശാൻകുട്ടി ചൊടിച്ചു. “എന്തൂട്ടിന്. അടിക്കാനാ?”

“അല്ല. അടിച്ചട്ട് വണ്ട്യോടിക്കാൻ”

“എന്നാപ്പിന്നെ വേറാരേങ്കിലും എറക്കാം”

“മതി”

വിഷയം ലാഘവത്വത്തോടെയാണ് പുരോഗമിച്ചതെങ്കിലും ക്രമേണ ആരെയെങ്കിലും കളത്തിലിറക്കണമെന്ന അഭിപ്രായം പ്രബലമായി.

ബൈക്ക് റേസിങ്ങിനു പറ്റിയ ഒരുപാടു പിള്ളേരുള്ള സ്ഥലമാണ് ചെറുവാളൂരും വാളൂരും. അന്നമനടയിൽനിന്നു കൊരട്ടിയിലെത്താൻ ഇവന്മാർ രണ്ടുമിനിറ്റേ എടുക്കുള്ളൂ. ചിലർ ഇടത്തരം റേസിങ്ങ് ടൂർണമെന്റുകളിൽ പങ്കെടുത്തു പരിചയമുള്ളവരാണ്. വിജയിക്കലും അപൂർവ്വമല്ല. ഈ വിധ കാണങ്ങളാലാണ് ടൂർണമെന്റ് സംഘടിപ്പിക്കാൻ തീരുമാനിച്ചത്. ഡ്രൈവിങ്ങ് രംഗത്തു ചെറുവാളൂരിനെ അപേക്ഷിച്ച് കക്കാടിൽ എടുത്തുപറയാൻ മാത്രം ആരുമില്ല. കൂടിവന്നാൽ ഒരു നവീൻ. ആക്സിഡന്റുകൾ തുടർക്കഥയായതോടെ അദ്ദേഹം ബൈക്ക് വിറ്റു. ‘നടരാജ’യിലായി പിന്നീടുള്ള യാത്രകൾ. റേസിങ് ടൂർണമെന്റിൽ ആരെയിറക്കണം എന്ന കാര്യത്തിൽ  മര്യദാമുക്കിലെ കൂടിയാലോചന പിന്നേയും നീണ്ടു. ഒടുക്കം ‘പ്രൈഡ് ഓഫ് മഡോണ’, ‘പ്രൈഡ് ഓഫ് ബജാജ്’ എന്നീ ഇരട്ടഖ്യാതികളുള്ള കാതിക്കുടത്തെ സജീവന്റെ പേരിൽ എല്ലാവരും ധാരണയിലെത്തി. തിരഞ്ഞെടുക്കപ്പെട്ട വിവരം അദ്ദേഹത്തെ അറിയിക്കാൻ ആശാൻകുട്ടിയെ ചുമതലപ്പെടുത്തി.

കാതിക്കുടം ഓസീൻ കമ്പനിക്കടുത്തു, ശങ്കരേട്ടന്റെ റേഷൻകടക്കു സമീപം താമസിക്കുന്ന മൊതയിൽവീട്ടിൽ സജീവൻ എന്ന ‘ബജാജ് സജീവൻ’ ചാലക്കുടിയിലെ പ്രശസ്തമായ ബജാജ് ഓട്ടോസർവീസ് സെന്ററിലെ ചീഫ് മെക്കാനിക്കാനിക്കാണ്. നാട്ടിലും പുറത്തും ഇദ്ദേഹം അറിയപ്പെടുന്നത് ‘പ്രൈഡ് ഓഫ് മഡോണ’ എന്ന പേരിലാണ്. പ്രസ്തുതനാമം ഒരു പുരസ്കാരമാകുന്നു. സമ്മാനിച്ചത് മറ്റാരുമല്ല, ബജാജ് മോട്ടോർസിന്റെ ഉടമ സാക്ഷാൽ രാഹുൽ ബജാജ് തന്നെ. രണ്ടുപേരും തമ്മിൽ അടിമ – ഉടമ ബന്ധമേയുള്ളൂ എന്ന തെറ്റിദ്ധാരണയൊക്കെ തകർത്താണ് ഒരുദിവസം മഡോണ ഓഫീസിലേക്കു രാഹുൽജിയുടെ വിളി വരുന്നത്. തത്സമയം സജീവൻ ജാക്കിയിലുയർത്തിയ ജീപ്പിനടിയിൽ തലതിരുകി ഉറങ്ങുകയായിരുന്നു. പ്രത്യക്ഷത്തിൽ ജോലിയിലും സത്യത്തിൽ ഉറക്കത്തിലും വ്യാപൃതൻ.

ടെലഫോണിലൂടെ പ്രവഹിച്ച അനർഗളമായ ഹിന്ദിയിൽ സജീവൻ പതറിയില്ല. നേരിട്ട എല്ലാ ചോദ്യങ്ങൾക്കും ‘അച്ചാ ഹൈ’ എന്നും ‘അച്ചാ നഹി ഹൈ’ എന്നുമുള്ള രണ്ടേരണ്ടു ഉത്തരങ്ങളാൽ മറുപടി പറഞ്ഞു. ചില കാര്യങ്ങൾ ഹിന്ദിയിൽ അങ്ങോട്ടും ചോദിച്ചു. അതോടെ രാഹുൽജി പത്തിമടക്കി. സംഭാഷണം നിർത്തി. ആകാംക്ഷഭരിതരായി ചുറ്റും കൂടിയവരെ സജീവൻ കാര്യമറിയിച്ചു. മഡോണ സർവ്വീസ് സെന്ററിൽ മെക്കാനിക്കായി സേവനം തുടങ്ങിയിട്ടു ഇന്നേക്കു പത്തുവർഷം തികയുകയാണെന്നും, ഈ അവസരത്തിൽ രാഹുൽജി ‘പ്രൈഡ് ഓഫ് മഡോണ’ പുരസ്കാരവും, ഇനിയും പുറത്തിറങ്ങിയിട്ടില്ലാത്ത പുതിയമോഡൽ ബൈക്കും സമ്മാനിക്കാൻ തീരുമാനമെടുത്തതായും സജീവൻ പറഞ്ഞു. പുതിയമോഡൽ ബൈക്കിനു തന്റെ ബഹുമാനാർത്ഥം ‘ബജാജ് സജീവ്’ എന്നു നാമകരണം ചെയ്യണമെന്ന അഭ്യർത്ഥന രാഹുൽജി അംഗീകരിക്കാൻ ഇടയുണ്ടെന്നും സജീവൻ കൂട്ടിച്ചേർത്തു.

മഡോണ ഗാരേജിന്റെ മുതലാളി പറഞ്ഞു. “നിനക്കിപ്പോ എന്തിനാ സജീവാ ബൈക്ക്? എല്ലാ ദെവസോം ഇവടന്ന് ഏതെങ്കിലും വണ്ടീം കൊണ്ടല്ലേ രാത്രി വീട്ടീപ്പോണെ”

സജീവൻ നെറ്റിചുളിച്ചു. “അതോണ്ട് ?”

“അതോണ്ട് രാഹുൽജി തരണ പുതിയ ബൈക്ക് മഡോണക്ക്. നിനക്ക് ഇവടത്തെ ബൈക്ക്”

സജീവൻ ഉടൻ രാജിയെഴുതി ഒപ്പിട്ടു കൊടുത്തു. ‘പ്രൈഡ് ഓഫ് മഡോണ’ രാജി വക്കുകയോ!. അസാധ്യം. മുതലാളി അയഞ്ഞു. ഒരാഴ്ചക്കുള്ളിൽ പുതിയമോഡൽ ബൈക്ക് സജീവന്റെ വീട്ടിലെത്തി.

മൊതയിൽവീട്ടിൽ ഭാസ്കരന്റെ രണ്ടു ആണ്മക്കളിൽ രണ്ടാമനാണ് സജീവൻ. പത്തെണ്ണമായാലും പോറ്റാൻ ത്രാണിയുണ്ടായിരുന്ന ഭാസ്കരേട്ടൻ മക്കൾ രണ്ടുമതിയെന്നു തീരുമാനിച്ചു. ആദ്ദേഹത്തിന്റെ ഈ തീരുമാനം പിന്നീട് ഇന്ത്യാ ഗവൺമെന്റ് ഏറ്റെടുക്കുന്നതാണ് കാതിക്കുടം ദേശക്കാർ കണ്ടത്. ഒന്നുതൊട്ടു ഏഴുവരെ കാതിക്കുടം യുപി സ്കൂളിലും അതിനുശേഷം വാളൂർ ഹൈസ്കൂളിലും പഠിച്ച സജീവനു എസ്എസ്എൽസിക്കു കിട്ടിയ മാർക്ക് കൃത്യം ഇരുന്നൂറ്റിപ്പത്തായിരുന്നു. എന്നിട്ടും ചാലക്കുടി ഐടിഐയിൽ മെഷിനിസ്റ്റ് ട്രേഡിൽ പ്രവേശനം ലഭിച്ചത് ഐടിഐയുടേയും കാതിക്കുടത്തിന്റേയും ചരിത്രത്തിലെ ഒന്നാമത്തെ വിസ്മയമാണ്. മെഷിനിസ്റ്റ് ട്രേഡിൽ മിന്നുന്ന പ്രകടനം കാഴ്ചവച്ച സജീവനെ കാമ്പസ്ഇന്റർവ്യൂവിൽ ചാലക്കുടിയിലെ മഡോണ ഗാരേജുകാർ കൊത്തിക്കൊണ്ട് പോയത് രണ്ടാമത്തെ വിസ്മയവും ആകുന്നു. മഡോണ ഗാരേജിൽ വണ്ടികഴുകിയും പെയിന്റടിച്ചും സേവനം ആരംഭിച്ച സജീവന്റെ രാശി തെളിയുന്നത് ഇരുചക്രവാഹനങ്ങളുടെ വില്പനയിൽ ഇടനിലക്കാരനായി പ്രവർത്തിക്കാൻ തുടങ്ങിയതോടെയാണ്. ഒരു കൊല്ലത്തിനുള്ളിൽ ചാലക്കുടിക്കു ചുറ്റും പത്തുകിലോമീറ്റർ വ്യാസത്തിലൊരു വൃത്തം വരച്ചാൽ ആ വൃത്തത്തിലുള്ളവർക്കെല്ലാം ഇരുചക്രവാഹങ്ങളുടെ ക്രയവിക്രയങ്ങൾക്കു സജീവൻ മതിയെന്ന നിലയായി. ചുരുക്കിപ്പറഞ്ഞാൽ സെക്കന്റ്ഹാൻഡ് വാഹനവിൽപനയുടെ കുത്തക സജീവൻ & പാർട്ടിയുടെ കയ്യിൽ. സജീവനുവേണ്ടി എല്ലായിടത്തും ഏജന്റുമാർ പ്രവർത്തനം തുടങ്ങി. അവർക്കു നല്ല കമ്മീഷനും ലഭിച്ചു. കസ്റ്റമേഴ്സിന്റെ ഒഴുക്ക് കൂടിയപ്പോൾ സജീവൻ വീട്ടിൽ ഓഫീസ് തുടങ്ങി. പ്രത്യേക ലെറ്റർപാഡ് തയ്യാറാക്കി അതു രജിസ്റ്റർ ചെയ്തു. അങ്ങിനെ സജീവൻ കാശുകാരനായി. ‘ബൈക്ക് വേണം സജീവാ’ എന്നുപറഞ്ഞു മിനിമം നാലു കേസെങ്കിലും ഒരാഴ്ചയിൽ അദ്ദേഹത്തെ തേടിയെത്തും. ഒരു കേസിനു കമ്മീഷൻ അഞ്ചെങ്കിലും കിട്ടും. അങ്ങിനെ നാലും അഞ്ചും ഇരുപതിനായിരം പോക്കറ്റിൽ! ഇത്തിരി കുറഞ്ഞാലും പതിനഞ്ചു നിശ്ചയമാണ്. ഇങ്ങിനെ വണ്ടിവിറ്റു കിട്ടിയ കാശുകൊണ്ടാണ് അദ്ദേഹം ഇരുനിലവീട് വക്കാൻ പ്ലാനിട്ടതും ഭാര്യാസഹോദരിയെ കനത്ത സ്ത്രീധനം കൊടുത്ത് കെട്ടിച്ചയച്ചതും, കരിമ്പനക്കാവ് അമ്പലത്തിലെ ഉൽസവത്തിനു അമ്പതു രൂപ സംഭാവന ചോദിച്ചപ്പോൾ ‘ഇന്നാ മേന്‌നെ ഒരു അയ്യായിരം’ എന്നു പറഞ്ഞ് ആയിരത്തിന്റെ അഞ്ചുനോട്ടുകൾ കീറിക്കൊടുത്ത് സജീവൻ മുതലാളി എന്ന് പലരെക്കൊണ്ടും വിളിപ്പിച്ചതും!.

ആശാൻകുട്ടി ബൈക്ക്റേസിങ്ങ് കാര്യം പറയാൻ ചെല്ലുമ്പോൾ സജീവൻ അയൽവാസിയായ മാധവൻ സുനിയുടെ ഹോട്ടലിൽ ചോറുവച്ച ചെമ്പുകഴുകുകയായിരുന്നു. കഷ്‌ടി അഞ്ചടിപൊക്കമുള്ള സജീവൻ തന്റെയത്രയും വലിപ്പമുള്ള ചെമ്പ് കഴുകുന്നത് കാണേണ്ട കാഴ്ചയാണ്. ചെമ്പിന്റെ ഒരറ്റത്തു രണ്ടുകാലും ആവുന്നത്ര അകത്തിവക്കും. കൈകൾ ചെമ്പിന്റെ എതിർഭാഗത്തു പിടിക്കും. കൈകളുടേയും കാലുകളുടേയും സ്ഥാനം ഏകദേശം ഗുണനചിഹ്നം പോലെയായിയിരിക്കും. ഈവിധം കമിഴ്ന്നു കിടന്നു, ഒരു കൈ ആവശ്യാനുസാരം ഉപയോഗിച്ചാണ് ചെമ്പു കഴുകുക. അതീവശ്രമകരമായ ഈ ജോലിചെയ്യാൻ അദ്ദേഹത്തിനു സന്തോഷമേയുള്ളൂ.

ആശാൻകുട്ടി ചെമ്പിന്റെ അടുത്തുചെന്നു. “സജീവാ നീയിങ്ങട് വന്നേ. ഒരു കാര്യം പറയാന്ണ്ട്”

സജീവൻ എഴുന്നേറ്റു. കൈലിയിൽ കൈതുടച്ചു. ആശാൻകുട്ടിയുടെ അടുത്തെത്തി. എന്തോ പന്തികേട് പോലെ. ആശാനെ ആകെ ഉഴിഞ്ഞുനോക്കി ചോദിച്ചു.

“നീ വീശീണ്ടല്ലേ?”

“പുതുവർഷല്ലേ സജീവാ. അപ്പോ ഒന്ന് മിനുങ്ങി”

“ശവീ. എന്നട്ട് ഒരു തുള്ളി എനിക്ക് കൊണ്ടന്നാ. അതില്ല” സജീവൻ വികാരത്തിനു അടിമപ്പെട്ടു. “നിനക്കൊക്കെ എന്നോട് വല്ല സ്നേഹണ്ടാ. അല്ല നീ പറ.. സ്നേഹണ്ടാ?”

കൈപ്പടം പരത്തി നെറ്റിയിൽവച്ച്, സമീപമുള്ള മരത്തിൽചാരി, ആശാൻകുട്ടി ദുഃഖിതനായി.

സജീവൻ തുടർന്നു. “ഇവടൊരുത്തൻ കാലത്തുമൊതൽ ചെമ്പും പാത്രോം കഴുകി വയ്യാണ്ടിരിക്കണ്”

അശാൻ‌കുട്ടി സജീവന്റെ കൈത്തലം ഗ്രഹിച്ചു. “പറ്റിപ്പോയി സജീവാ. ഒക്കെ പറ്റിപ്പോയി. ഇന്ന് വൈന്നേരം മുഴ്വോൻ നമ്മള് മധുരേലാണ്”

സജീവന്റെ മുഖം തെളിഞ്ഞു. “ഏറ്റോ?”

“അമ്മയാണെ, അച്ചനാണേ, അയ്യങ്കോവ് ശാസ്താവാണെ സത്യം. ഞാനേറ്റു സജീവാ. നീ വാ പറയട്ടെ”

ആശാൻകുട്ടി ചുരുങ്ങിയ വാക്കുകളിൽ കാര്യം ധരിപ്പിച്ചു. റേസിങ്, ‘മര്യാദക്കാരുടെ’ തീരുമാനം, അങ്ങിനെയങ്ങിനെ. എല്ലാം കേട്ടുകഴിഞ്ഞു സജീവൻ ചോദിച്ചു.

“അപ്പോ എനിക്കെന്ത് കിട്ടും?”

“ഒരു ഫുള്ള്”

“എപ്പോ?”

“ഇന്ന് വൈന്നേരം”

“അതല്ല ഞാഞ്ചോദിച്ചേ. റേസിങ്ങീ പങ്കെടുത്താ എനിക്കെന്ത് കിട്ടൂന്ന്?”

ആശാൻകുട്ടി ചൂടായി. “ഉണ്ട”

“അങ്ങനെ പറഞ്ഞാ പറ്റ്വോ ആശാനേ. എന്തേലും തടയാണ്ട് എന്തോന്ന് മൽസരം”

“മൽസരത്തീ ജയിച്ചാ മൂവായിരം രൂപേം രണ്ട് താറാവിനേം ഒരുകുപ്പി കള്ളും കിട്ടും. അതുപോരേ?”

“പോരാ”

“എന്നപ്പിന്നെ നമക്ക് കാണാം. കക്കാടീന്ന് ഒരു വണ്ടിക്കേസും നിനക്കിനി കിട്ടൂന്ന് കര്തണ്ട. വാളൂരിലേം ഞാൻ മൊടക്കും. ഫലം നീ തെണ്ടും”

ആശാൻകുട്ടി ഭിക്ഷക്കാരെപോലെ കൈനീട്ടി രംഗം ആവിഷ്കരിച്ചു. അതുകണ്ടു സജീവൻ പതറി. സ്വയം തെണ്ടുന്നത് ഭാവനയിൽ സങ്കൽപിച്ചു നോക്കി. ഹോ ഭയങ്കരം. ആശാൻകുട്ടിക്കു നാട്ടിലും പുറത്തും അപാരപിടിയാണ്. പിണക്കിവിട്ടാൽ സെക്കന്റ്ഹാൻഡ് വണ്ടിക്കച്ചവടം എപ്പോൾ പൊട്ടിയെന്നു ചോദിച്ചാൽ മതി. ഒരുപാട് കാശുപോകുന്ന കാര്യം ഓർത്തപ്പോൾ സജീവൻ തോൽവി സമ്മതിച്ചു.

“ഞാനൊരു നമ്പറിട്ടതല്ലേ ആശാനേ. നീയത് കാര്യാക്ക്യാലോ?”

”നിന്റെ നമ്പറോള് എനിക്കറീല്ലേടാ”

സജീവൻ ഒന്നാലോചിച്ചു. “ഞാനെറങ്ങാം ആശാനേ. ഏറ്റു. പക്ഷേ എന്റെ വണ്ടിയത്ര പോര. റേസിങ്ങീ അതുംകൊണ്ട് പങ്കെടുക്കാൻ പറ്റില്ല”

“വണ്ടി നമക്ക് ജയേഷിനോട് ചോദിക്കാം”

പിറ്റേന്ന് രണ്ടുപേരും മേലാപ്പിള്ളി ജ്വല്ലറിവർക്ക്‌സിലെ ജയേഷിനെ പോയികണ്ടു